എനിക്കും ഉണ്ടായിരുന്നു ഒരു ഗള്‍ഫ് ജീവിതം..ഭാഗം..18

“സുന്ദരനും സുമുഖനും കോമളനും ആരോഗ്യ കൃശഗാത്രനുമായ 5 അടിപൊക്കവുമുള്ള ചെറുപ്പക്കാരനു വധുവിനെ തേടുന്നു..ഇപ്പോള്‍ അബൂദാബിയില്‍ “അബൂദാബി നാഷണല്‍ ഫുഡ് സ്റ്റഫില്‍” ജോലിനോക്കുന്നു”

                                                                 അബൂദാബിയില്‍ എത്തിയിട്ട് ആദ്യമൂന്ന് വര്‍ഷം പിന്നിട്ട് കഴിഞ്ഞപ്പോള്‍ ...ആദ്യമായി നാട്ടിലേക്ക് ലീവിനു പുറപ്പെടാനുള്ള തയ്യറെടുപ്പ്...

ഞാന്‍ ലീവിനു വരുന്നുണ്ടെന്ന് അറിഞ്ഞപ്പോള്‍ മാദ്യമം പത്രത്തില്‍ എന്റെ ബാപ്പിച്ചി കൊടുത്ത് ഒരു പരസ്യം ആണു മുകളില്‍ കൊടുത്തിരിക്കുന്നത്....ഈ പരസ്യം കണ്ടപ്പോള്‍ ഞാന്‍ ആദ്യം ചെയ്ത പണി കണ്ണാടിയില്‍ നോക്കുകയായിരുന്നു...

മേലെ പറയപ്പെട്ട  സുന്ദരനും സുമുഖനും കോമളനും ആരോഗ്യ കൃശഗാത്രനേയും ഞാന്‍ ഇത് വരേയും കണ്ടിട്ടുണ്ടായിരുന്നില്ല...ഒന്ന് കാണുകയും പരിചയപ്പെടുകയും ചെയ്യാമല്ലോ എന്ന് കരുതിയാണ്...കണ്ണാടി നോക്കിക്കഴിഞ്ഞപ്പോള്‍ ഒരു കാര്യം എനിക്ക് മനസ്സിലായി...പരസ്യത്തില്‍ ആകെ ഒരു കാര്യമേ സത്യമുള്ളൂ..അത്

“വധുവിനെ തേടുന്നു” എന്നത് മാത്രം....പൊക്കവും കണക്കിലും മൂന്നിഞ്ച് കുറവ്..

മൂന്ന് മാസത്തെ ലീവിനാണു ഞാന്‍ നാട്ടില്‍ എത്തുന്നത്...ആദ്യമാസം നോമ്പ്...അതങ്ങനെ പോയി...പിന്നീടുള്ളത് രണ്ട്മാസം ആകുന്നു...അതിനുള്ളില്‍ കല്യാണം നടക്കണം...അതിന്റ്റെ വേഗതക്ക് വേണ്ടിയാണു പത്രത്തില്‍ പരസ്യം കൊടുത്തത്...ആദ്യമായി എന്നെ കുറിച്ച് പത്രത്തില്‍ വന്നതിന്റെ അഹങ്കാരം ഒന്നും എനിക്കുണ്ടായിരുന്നില്ല....

ഒരുത്തനു ഒരുത്തി വരുന്നെന്നല്ലെ പ്രമാണം...ആ ഒരു പ്രമാണം കാത്തുള്ള എന്റെ ഇരുപ്പ് തുടരുന്നു...ഈ പറയപ്പെട്ട ഒരുത്തന്റ്റെ ഒരുത്തി....ഒരു “തീ” ആവാതിരുന്നാല്‍ മതിയായിരുന്നു...എന്നായി എന്റെ ചിന്ത...

എല്ലായിടത്തും പെണ്ണ് കാണാന്‍ പോയിവന്നാലും തീരുമാനങ്ങളെല്ലാം പെണ് വീട്ടുകാര്‍ക്ക് ഒന്ന് തന്നെയായിരുന്നു...“ ചെറുക്കനു ഉയരം ഇല്ല”..

ഞാന്‍ ഇങ്ങനെ പെണ്ണുകാണാന്‍ വരുമെന്നും എല്ലാവരും ഈ ഒരു ഉത്തരമേ പറയാന്‍ പാടുള്ളു എന്നും  ഉറച്ച തീരുമാനത്തില്‍ എത്തിയത് പോലെയാണ് സംസാരം..
അങ്ങിനെ ഒരു സുപ്രഭാതത്തില്‍ വീട്ടിലെ ലാന്റ്റ് ഫോണ്‍ നിര്‍ത്താതെ റിങ്ങ് ചെയ്യുന്നു...പേപ്പറിലെ പരസ്യം കണ്ട് ആലുവാ പെരുമ്പാവൂര്‍ റൂട്ടില്‍ നിന്നും ആണു വിളി....പത്രത്തില്‍ നിന്നുള്ള അറിവ് വച്ച് അവര്‍ക്ക് താത്പര്യമുണ്ടെന്നും പെണ്ണുകാണാന്‍ അങ്ങോട്ട് ചെല്ലണമെന്നുമാണ് ഫോണിലൂടെ കിട്ടിയ അരുളപ്പാട്..

അങ്ങനെ പിറ്റേ ദിവസം ഞാനും ബാപ്പിച്ചിയും ഉമ്മച്ചിയും കൂടി പെണ്ണ്കാണാന്‍ പെരുമ്പാവൂര്‍ക്ക്..................................................തുടരും...